2 coed utas sa aburidong lalaki

MANILA, Philippines – Dalawang estudyanteng babae ang nasawi nang sila ay pagbalingan ng saksak ng isang lalaki na aburido sa paghahanap sa dating nobya na naganap kamakalawa sa inuupahang bahay ng mga una sa Brgy. Centro Occidental, Polangui, Albay.

Ang mga nasawi ay kinilalang sina Jenyfe Palermo, 19, dalaga, ng Brgy. Anopol ng nasabing lugar at Lovely De Vela, 22, tubong Labo, Camarines Norte.

Ang suspek na sumuko ay kinilalang si Raymund Gebelagiun, 24, binata ng Brgy. Laganak, Balatan, Camarines Sur.

Batay sa ulat, dakong ala-1:40 ng hapon ay kasalukuyang nasa sala ng Gaspar Badong Apartment ang dalawang biktima na kasalukuyang nagsasagawa ng group study nang biglang pumasok ang suspek.

Tinanong ng suspek sa dalawang biktima kung naroon sa kanilang kuwarto ang dating nobya, subalit sumagot ang mga biktima na wala ito.

Ikinainis ito ng suspek at agad na inatado ng saksak ang dalawang dalaga.