4 bagets todas sa baha at kidlat

MANILA, Philippines - Tatlong tinedyer ang  nasawi sa baha habang ang pang-apat ay tinamaan ng kidlat dulot ng malalakas na pagbuhos ng ulan sa lalawigan ng Cebu  nitong Lunes ng hapon.

Ang mga nasawi ay kinilalang sina Richel Ann Paraje, 15; Caroline Marson, 15 at Earv Kyle Sardido, 13 na nalunod nang umapaw ang tubig baha na rumagasa mula sa ilog sa bayan ng Argao, Cebu dulot ng malalakas na pagbuhos ng ulan sa Central Visayas sanhi ng low pressure area (LPA).

Batay sa ulat, dakong alas-3:20 ng hapon ay kasalukuyang tumatawid ang tatlong tinedyer sa spillway ng Brgy. Calagasan pauwi sa kanilang tahanan galing sa Calagasan National High School nang tangayin ang mga ito ng tubig baha.

Bandang ala-1:30 naman ng tanghali nang tamaan ng kidlat ang 16-anyos na si William Cabijan sa Brgy. Guadalupe, Cebu City. Nagawa pang maisugod ito sa pagamutan, subalit idineklara itong dead on arrival.