3 killer ng hepe utas sa resbak

MANILA, Philippines - Namatay noon din ang tatlong katao matapos pagbabarilin ng kaanak ng isang hepe ng pulisya na kanilang pinatay matapos na sumugod ang mga ito kamakalawa ng gabi sa Brgy. Tamontaka, Datu Odin Sinsuat, Maguindanao.

Dalawa sa tatlong nasawi ay kinilalang sina Omar Guro at Ibrahim Bansuan; pawang may nakabimbing kasong illegal possession of firearms at robbery at isa pang hindi natukoy ang pagkakakilanlan.

Pinaghihinalaan na ang mga nasawi ay may kagagawan umano nang pamamaslang sa dating hepe ng Mother Kabuntalan Police na si Inspector Tongan Namla noong Marso 26 ng taong ito.

Batay sa ulat, dakong alas-8:00 nang gabi ng sumugod ang tatlo sa bahay ni Namla upang  umano’y linisin ang kanilang pangalan sa krimen nang paulanan sila ng bala ng mga kamag-anak ng nasawing opisyal.

Nakipagpalitan naman ng putok ang mga suspek sa mga kamag-anak ni Namla na  ilan ay mga  pulis umano na nakatalaga rin sa lalawigan ng Maguindanao na ikinasawi ng tatlo.

Narekober mula sa bangkay ng isa sa mga napatay na suspek ang baril ni Namla na tina­ngay ng mga ito noong pagbabarilin at mapatay ang nasabing opisyal.