Love triangle tinapos sa saksak... lover ng misis, todas kay mister

MANILA, Philippines - Pinatay sa saksak ng isang mister ang itinuturong lover ng kanyang misis habang kritikal naman ang misis nito at suga­tan ang kanyang biyenan naganap kamakalawa ng  gabi sa Sta. Rosa City, Laguna.

Namatay habang nilalapatan ng  lunas sa Polyclinic Hospital ang biktima na si Jerson Tajuna, nasa hustong gulang dahil sa mga tinamong saksak sa iba’t ibang bahagi ng katawan. 

Nilalapatan naman ng lunas sa pagamutan ang mga biktimang sina Mary Anne Segler, 25; misis ng suspek na si Efren Segler, 33, at ang biyenan na si Nadene Pacheco, 47 na pawang nasa kritikal na kondisyon dahil sa tinamong mga saksak sa bibig at iba pang bahagi ng katawan.

Tumakas ang suspek na si Efren na nahaharap sa kasong murder, frustrated parricide at frustrated homicide.

Sa imbestigasyon, dakong alas-8:00 ng gabi ay kasalukuyang sakay si Tajuna  ng kaniyang  kulay asul na motorsiklong Suzuki sa bisinidad ng Southville Pooc, Sta. Rosa City, Laguna nang lapitan at bigla na lamang pagsasaksakin ng suspek.

Matapos pagsasaksakin ang biktima ay tinu­ngo ng suspek ang bahay ng biyenan sa Mabuhay Homes, Brgy. Mamatid, Cabuyao, Laguna  na  kung saan ay nandun ang kaniyang misis at pinagsaksak din.

Nasugatan naman ang kaniyang biyenan matapos na tangkain nitong pigilan ang kaniyang manugang sa pananaksak sa kaniyang anak. 

Lumilitaw sa imbestigasyon na  love triangle ang motibo ng krimen kaugnay ng napapa­balitang pakikipagrelasyon ng  misis ng suspek sa biktima.