Habang nangangampanya Angelika dela Cruz, muntik masaksak

MANILA, Philippines - Habang nangangampanya ay tinangkang saksakin ng isang lalaki ang aktres na si Angelika Dela Cruz sa Malabon City, kamakalawa ng gabi.

Si Angelika o Maria Lourdes Egger dela Cruz sa totoong buhay, 32-anyos ay  nagawang iligtas ng kanyang alistong tagasuporta mula sa kamay ng suspek na si  Pedro Becondado, ng Quirino St. Tondo, Maynila.

Sa ulat ng Malabon City Police, nasa kasagsagan ng pangangampanya ang grupo ni Dela Cruz sa Maya-Maya Street, Brgy. Longos, na tumatakbong Chairwoman dakong alas-6 ng gabi nang pasimple siyang lapitan ng suspek.

 Masuwerte na alerto ang mga kasamahan ni Dela Cruz at maagap na naharang si Becondado.  Dito na kinuyog ng mga tagasuporta ni Dela Cruz ang suspek habang inilayo sa lugar ang aktres.

Bukod sa bugbog, nagtamo rin ng isang tama ng saksak sa katawan ang suspek na si Becondado na isinugod naman sa Tondo Medical Center.

 Patuloy ngayong inaalam ng pulisya ang motibo ng tangkang pananaksak ni Becondado kung saan inaalam din kung tagasuporta ito ng mga kalaban ni Dela Cruz sa darating na halalan.