Pamilya, 5 natupok sa sunog

MANILA, Philippines -Limang miyembro ng isang pamil­ya ang nasawi ma­tapos na makulong sa na­susunog nilang establisyemento sa bayan ng Claver, Surigao del Norte kamakailan.

Batay sa ulat, kaha­pon lamang ng umaga naiulat ang insidente sa pulisya dahilan may kalayuan ang lugar na pinangyarihan ng sunog na naganap dakong alas-12:10 ng madaling-araw noong Lunes.

Ang mga biktima ay ki­nilalang sina Glicerio Macalos, 73; misis nitong si Marites, 49; mga anak na sina Axel John, 11; Mitch, 7 at Angel, 5.

Batay sa ulat, naganap ang insidente sa isang lugar ng komersyo may ilang metro ang layo mula sa Taganito Mining Corporation sa bayan ng Claver.

Nabatid na ang pa­mil­ya ay nasa loob ng ka­nilang auto shop supply nang magsimula ang sunog sa katabing boarding house.

Mabilis na kumalat ang apoy na umabot sa tindahan ng pamilya Macalos at katabi nitong vulcani­zing shop na kung saan ay hindi nakalabas ang mga ito.

Sa inisyal na pagsu­suri ng mga arson investigator na faulty elec­tri­cal wiring sa loob ng boarding house ang pi­nag­mulan ng sunog.

Tinatayang aabot sa P2.5M halaga ng ari-arian ang natupok sa sunog na tumagal hanggang nitong Lunes dakong alas-2:00 ng madaling-araw.