Parking attendant ginulpi ng mayor at bodyguards

MANILA, Philippines - Nanghiram ng mukha sa aso ang isang parking attendant ng Manila Traffic and Parking Bureau (MTPB) matapos na siya ay pagtulungang gulpihin ng isang lalaki na nagpa­kilalang mayor at mga bodyguards nito kamakalawa ng  hapon sa  Mabini St., Maynila.

Sa ulat ni MTPB chief Carter Logica, bago naga­nap ang pagbugbog dakong alas-3:00 ng hapon sa biktimang si Joseph Purisima ay nakita nito dakong alas-6:30 ng umaga ang nakaparadang puting Starex van (ZSZ-458) sa harap ng Prestige Salon and Barber shop sa Mabini St.

Tinanong ng biktima ang isang lalaki kung magtatagal sa lugar na sinagot na sandali lamang silang paparada kaya’t hindi sila titikitan sa loob ng 15 mi­nuto.

Subalit, tumagal hang­gang alas-3:00 ng ha­pon ang pagpaparada kung kaya’t sinabihan ni Pu­risima ang lalaki na kaila­ngan na nilang mag­ba­ yad.

Dito na lumabas ang nagpakilalang mayor at agad na sinapak si Purisima kung saan nakibugbog na rin ang   tatlo umano nitong bodyguards.

Nang makitang ma­rami ang nakatingin, ma­bilis na umalis ang hindi pa nakikilalang mga suspek, subalit ayon sa ilang saksi,  ang may-ari umano ng barbershop ang bumugbog kay Purisima.

Nang hingan ang Luneta PCP ng report sa insidente ay ibinigay ng pulis sa biktima ang plakang XKL-525 gayung nakita ng biktima na ang plaka ay ZSZ-458.