2 Lalaki dedo sa pamamaril sa QC

MANILA, Philippines - Dalawang lalaki ang nasawi matapos na pagbabarilin sa magkahiwalay na lugar sa Quezon City kamakalawa at kahapon ng umaga.

Ang  unang nasawi ay kinilalang si Patrick Poncebalasi, 41, na nagtamo ng mga tama ng bala sa kanyang katawan.

Batay sa ulat, alas-11:45 ng gabi nang barilin ang biktima ng hindi pa kilalang suspek sa kahabaan ng Nenita St., Brgy. Gulod, Novaliches.

Narekober sa lugar ang anim na basyo ng bala at isang hindi pumutok na bala ng kalibre 45 baril.

Ang ikalawang nasawi ay si Reynald dela Cruz, 32, tricycle driver at residente ng no.72 Harmony Road, Brgy. Balingasa sa lungsod.

Batay sa ulat, ganap na alas-8:45 ng umaga ay namamasada ang biktima at pagdating sa harap ng Mercury Drug store na matatagpuan sa A. Bonifacio Street, malapit sa 11th avenue Brgy. Balingasa ay pinagbabaril ito ng nag-iisang lalaki na kaswal lang naglakad matapos ang pamamaril.