Nasabat na poultry products sinunog

MANILA, Philippines - Sinunog kahapon ng Bureau of Customs (BoC) ang 60 tonelada na smuggled poultry meat tulad ng peking duck, pigeons at piglets na nagkakahalaga ng P40 milyon sa First Link Container Yard sa Manila North Harbour Center, Tondo, Maynila.

Ayon kay Bureau of Customs (BoC) Commis­sioner Ruffy Biazon ang mga smuggled na poultry meat  na  nasabat sa Port of Manila noong Oktubre ay sinunog upang matiyak na hindi maipupuslit palabas sa merkado lalo’t malapit na ang Kapaskuhan.

Sinabi pa ni  Biazon na sa pamamagitan nito ay  maiiwasan ang anumang pagkakasakit ng publiko mula sa mga puslit at kontaminadong pagkain na maaaring ihanda sa kanilang noche buena.

Doble ang ginagawang   monitoring at checking ng mga tauhan ng BoC upang hindi malusutan ngayon holiday season ng mga sin­dikato at mga mapagsamantalang negosyante.

Magugunita na lulan ng dalawang containers ang P40 milyong halaga ng kontrabando na galing sa China at idineklara ng consignee na HEXA Tra­ding bilang frozen mackerel na nasabat ng Customs nang idaan ito sa x-ray machines.