Tricycle binangga ng truck: 2 bata patay, 6 sugatan
MANILA, Philippines - Namatay noon din ang isang magkapatid na paslit habang anim ang malubhang nasugatan matapos na salpukin ng isang dump truck ang kanilang sinasakyang tricycle kahapon ng umaga sa highway ng Brgy. Salvacion, Murcia, Negros Occidental.
Ang magkapatid na nasawi ay nakilalang sina Jona at Jessie Porque; pawang mga pupil sa Sta Cruz Elementary School at residente ng Brgy. Sta Cruz ng bayang ito.
Ang mga nasugatan na dinala sa ospital ay kinilalang sina Janet Porque, ina ng magkapatid; Sanday Sarcino, may-ari at driver ng tricycle, misis nitong si Maria Jenny Sarcino, anak na si John Mark at dalawa pang bata na hindi natukoy ang pangalan.
Batay sa ulat, bandang alas-6:45 ng umaga ay patungo sa kabayanan ng Murcia upang dumalo sana sa kapiyestahan ng Immaculate Concepcion ng nasabing bayan ang mga biktima nang pumutok ang gulong na naging dahilan para ito ay magpaekis-ekis ng takbo hanggang sa tuluyang nabangga ng kasalubong na dump truck na may kargang buhangin.
- Latest
