Sundalo utas sa bakbakan
MANILA, Philippines - Utas ang isang sundalo matapos makasagupa ang tinatayang may 30 miyembro ng mga rebeldeng New People’s Army (NPA) sa naganap na bakbakan sa bayan ng Matuguinao, Samar, kamakalawa ng tanghali.
Sinabi ni Captain Gene Orense, Spokesman ng Army’s 8th Infantry Division, bandang alas-12:10 ng tanghali ng makasagupa ng peace and development team ng 81st Division Reconnaissance Company ang grupo ng mga rebelde sa Brgy. del Rosario, Matuguinao.
Ayon kay Orense, kasalukuyang nagsasagawa ng security operations ang tropa ng pamahalaan sa nasabing lugar nang paputukan ng mga rebeldeng komunista na nauwi sa bakbakan.
Tumagal ng halos isang oras ang barilan na ikinasawi ng isang sundalo na tumanggi munang tukuyin ng opisyal ang pangalan dahil kailangan pang impormahan ang pamilya nito.
Ang mga rebelde ay mabilis na nagsitakas bitbit ang hindi pa madeterminang bilang ng mga nalagas nilang kasama.
- Latest
