Ateneo itutumba ng UP

MANILA, Philippines — Muling ipaparada ng University of the Philippines sina Nigerian center Francis Nnoruka, bagitong Veejay Pre at Arvie Poyos sa pagharap nila sa determinadong A­teneo de Manila University sa UAAP Season 89 men’s basketball tournament na lalaruin sa Araneta Coliseum ngayong araw.

Nais ng Fighting Maroons na ikadena ang pangalawang sunod na panalo sa pagsimula ng kanilang bardagulan ng Blue Eagles sa alas-5:30 ng hapon, maghaharap naman sa alas-3 ng hapon ang National University at University of the East.

Pinamunuan ni Nnoruka ang opensa para sa UP ng talunin nila sa pahirapang labanan ang University of Sto. Tomas, 92-85 noong Setyembre 13, nagtala ito ng double double na 18 points at 12 rebounds.

Malaking parte rin sa panalo ng UP ang newcomers na sina Pre at Poyos kung saan ay sinandalan sila sa bandang dulo ng laban para tulungan ang koponan na ilista ang 1-0 card.

Pero tiyak na mapapalaban muli ng todo ang Fighting Maroons dahil bukod sa ganadong maglaro ay misyon din ng Blue Eagles na sikwatin ang pangalawang sunod na panalo.