Mike Mojdeh hataw ng 5 golds sa PSAP
MANILA, Philippines — Nagpasiklab ng husto si Mikhael Jasper Mikee Mojdeh ng Immaculate Heart of Mary College-Parañaque nang sumisid ito ng limang gintong medalya sa Private School Association of Parañaque (PSAP) swimming tournament na magsisilbing daan para makapasok sa Palarong Pambansa sa susunod na taon.
Hindi nagsayang ng sandali si Mojdeh matapos pagharian ang elementary boys 200m freestyle sa bilis na dalawang minuto at 31 segundo para makuha ang kanyang unang gintong medalya.
Hataw pa ang 11-anyos Grade 6 student ng ginto sa kanyang paboritong 200m backstroke event kung saan inirehistro nito ang isang minuto at 21 segundo.
Namayagpag din si Mojdeh sa 200m individual medley (2:53), 400m freestyle (5:25) at 50m backstroke (36.00) para makumpleto ang matamis na sweep sa lahat ng kanyang limang events.
“These gold medal performances reflect the incredible dedication, discipline, and relentless drive of our athletes. Winning at this level isn’t an accident—it’s the result of hours in the pool, unwavering focus, and a relentless desire to excel,” ani BEST team manager Joan Mojdeh.
Wagi rin ng gintong medalya ang iba pang Behrouz Elite Swimming Team (BEST) members na sina Allen Miguel Fallarcuna, Tiffanie Amatorio at Ada Leandra De Guzman sa kani-kanyang dibisyon.
“Seeing our swimmers stand on top of the podium makes all the early mornings and intense training sessions worth it. I couldn’t be prouder of the heart, character, and sheer determination our team demonstrated in every event,” dagdag ni Mojdeh.
Sunod na sasabak ang BEST tankers sa Palarong Pambansa Division Meet na magsisilbing tulay para makapasok sa Regional Meet.
- Latest
