PLDT vs EST Cola sa PVL Invitationals opener

MANILA, Philippines — Sisimulan ng PLDT ang pagdedepensa sa kanilang suot na Premier Volleyball League (PVL)  Invitational Conference title laban sa guest team EST Cola ng Thailand.

Ang salpukan ng High Speed Hitters at Thai squad sa ala-1:30 ng hapon ang magbubukas sa torneo sa Agosto 31 sa Smart Araneta Coliseum.

Sa alas-4 ng hapon maglalaban ang Creamline Cool Smashers at Nxled Chameleons kasunod ang bakbakan ng Farm Fresh Foxies at guest team Ho Chi Minh City ng Vietnam sa alas-6:30 ng gabi.

Sa katatapos lamang na 2026 PVL On Tour ay nagtala ang PLDT ng malinis na 2-0 record.

Magkasunod na tinalo ng High Speed Hitters ang Choco Mucho Flying Titans, 25-21, 20-25, 29-27, 25-18, sa Vigan City, Ilocos Sur at ang Akari Chargers, 25-14, 26-24, 21-25, 25-10, sa Tubod, Lanao del Norte.

Nagpalakas din ang PLDT matapos makuha si 6-foot-1 opposite spiker Leila Cruz na nagmula sa Capital1 Solar Energy.

Makakasama ni Cruz sa High Speed Hitters ang mga kapwa dating La Salle Lady Spikers standouts na sina Kianna Kim Dy, Majoy Baron, Kim Fajardo at Mika Reyes bukod kay Fil-Canadian Savi Davison.

Ipaparada naman ng Creamline ang nagbabalik na si 6’5 middle blocker Jaja Santiago (Sachi Minowa) laban sa Nxled na inaasahang isasalang si Fil-Am Brooke Van Sickle.

Matapos ang PVL Invitational Conference ay lilipad na pa-Amerika si Santiago para sumama sa San Francisco Signal team sa League One Volleyball (LOVB) Pro.

“Sa Invitational were gonna do our very best. Magiging tight iyong schedule and hoping na maganda iyong recovery ng bawat isa everyday and every game,” wika ng 30-anyos na si Santiago.