Pepito kukunin ng Galeries sa PVL Draft?
MANILA, Philippines — May posibilidad na si libero Bernadett ‘Detdet’ Pepito ang kunin ng Galeries Tower bilang No 1 overall pick sa 2026 PVL Draft ngayong gabi sa Novotel Manila Araneta City.
Ang two-time UAAP Best Libero ng UST Tigresses ang ikalawang klase ng player na kailangan ng Highrisers matapos umatras si Alyssa Solomon.
Maaaring itambal ng Galeries Tower si Pepito kay setter Julia Coronel katuwang si star hitter Jean Asis.
Posible ring ikunsidera ng Highrisers si two-time UAAP Best Setter Camilla Lamina ng National University Lady Bulldogs bilang kapalitan ni Coronel sa opensa.
Ang Galeries Tower ang unang pipili sa PVL Draft kasunod ang Capital1 (No. 2), Choco Mucho (No. 3), Akari (No. 4), Nxled (No. 5), Farm Fresh (No. 6), PLDT (No. 7) at Creamline (No. 8).
Umatras ang 6-foot-1 na si Solomon, isang potential first-round selection, sa PVL Draft para tutukan ang kanyang paglalaro sa Alas Pilipinas na hahataw sa 2026 AVC Women’s Cup sa Candon City.
Titingin din ang dating Lady Bulldogs star sa ibang foreign leagues matapos sumalang para sa Osaka Marvelous sa SV.League ng Japan.
Hindi rin lalahok sa PVL Draft si four-time UAAP Best Middle Blocker Niña Ytang ng University of the Philippines Fighting Maroons na kasama sa Alas team.
Bukod kina Lamina at Pepito, ang iba pang UAAP standouts na kasama sa 38 aspirante ay sina Jonna Perdido at Xyza Gula ng UST, Irah Jaboneta, Joan Monares, Heart Magsombol at Jum Gayo ng UP, Tin Ubaldo, Ann Asis at Florize Papa ng FEU, Ela Raagas, Michelle Beterina at Sophia Sindayen ng La Salle, KC Cepada, Tin Ecalla at Kayce Balingit ng University of the East, Barbie Jamili ng Adamson at Taks Fujimoto ng Ateneo.
Kasama rin si Fil-Foreign prospect Jade Fuentes ng Cal State Dominguez Hills na dating naglaro sa La Salle Lady Spikers.
- Latest
