Converge balik sa porma

MANILA, Philippines —  Umeskapo ang Converge kontra sa Blackwater, 99-94, para sa matamis na balikwas sa PBA Season 50 Philippine Cup kahapon sa Ynares Sports Center sa Antipolo City.

Nagpakawala ng 9-2 ratsada ang FiberXers sa huling 4 minuto para sa pahirapang tagumpay na nagbalik sa kanila sa dikdikang karera para sa Top 4 at twice-to-beat advantage sa quarterfinals.

Galing sa 96-90 kabiguan ang Converge kontra sa reigning champion na San Miguel subalit mabilis na nakaganti upang makaangat sa 4-2 kartada para sa 4-way tie sa segunda puwesto.

Katabla ngayon ng mga bataan ni coach Dennis “Delta” Pineda ang Beermen, NLEX at Magnolia sa likod lang ng lider na Talk ‘N Text at Rain or Shine na may parehong 5-1 kartada.

Nagliyab sa 28 puntos si Alec Stockton sangkap pa ang 2 rebounds, 2 assists at 2 tapal upang pamunuan ang balanseng atake ng FiberXers.

Nag-ambag ng 14 puntos, 7 rebounds, 5 assists at 2 steals ang No. 2 overall rookie pick na si Juan Gomez de Liaño.

Kontrolado ng Fiber­Xers ang laro at abante pa ng hanggang 12 puntos sa third quarter, 74-62, bago abutan ng Bossing sa 92-90 matapos ang lay-up ng No. 3 rookie selection na si Dalph Panopio.

Subalit nilimitahan nalang ng Converge ang Blackwater sa 2 puntos buhat noon tungo sa 9 na sunod na puntos na tinul­dukan ng 2 free throws ni Stockton upang selyuhan ang laban.

Samantala, kanselado ang dalawang laro ngayon ng PBA sa Ynares Sports Center sa Montalban tampok ang duwelo ng TNT-Magnolia at Ginebra-Titan Ultra dahil sa paparating na bagyong ‘Uwan’.