Outright berth target ng Chery Tiggo

MANILA, Philippines — Ang outright quarterfinal spot ang target ng Chery Tiggo sa pagharap sa mapanganib na ZUS Coffee sa 2025 Premier Volleyball League (PVL) on Tour sa Candon City Arena sa Ilocos Sur.

Makikipagkita ang Crossovers sa Thunderbelles ngayong alas-4 ng hapon kasunod ang banatan ng Petro Gazz Angels at Choco Mucho Flying Titans sa alas-6:30 ng gabi.

Ang PLDT (5-0) at Nxled (4-1) ang nagbulsa ng dalawang automatic quarterfinal berth sa Pool A, habang magpupuwestuhan sa crossover knockout round ang Farm Fresh (3-2), Petro Gazz (1-3), Choco Mucho (1-3) at Galeries Tower (0-5).

Inangkin ng Cignal HD (4-1) ang outright quarterfinal ticket sa Pool B kasunod ang Creamline (3-2), Chery Tiggo (3-2), ZUS Coffee (2-2), Akari (2-3) at Capital1 Solar E­nergy (0-5).

Sakaling manaig ang Thunderbelles sa Crossovers ay magkakaroon ng isang three-way tie para sa second place sa Pool B kasama ang Cool Sma­shers.

Ang Creamline ang pipitas sa ikalawang outright spot dahil sa kanilang 10 total points kasunod ang Chery Tiggo (8 points) at ZUS Coffee (5 points).

Kapwa nagmula sa kabiguan ang Crossovers at Thunderbelles.

Bigo ang Chery Tiggo sa Creamline, 21-25, 25-19, 16-25, 18-25, habang minalas ang ZUS Coffee sa Cignal, 22-25, 17-25, 25-21, 16-25, sa Iloilo City leg noong Hulyo 20.

Muling sasandal ang Crossovers kina Cess R­obles, Ara Galang, Shaya Adorador, Pauline Gaston, Aby Maraño at rookies Renee Penafiel at Jyne Soreño.

Itatapat ng Thunderbelles sina Chinnie Arroyo, Fiola Ceballos, Jove Gonzaga, Chai Troncoso, Kate Santiago at rookies AC Miller at Mycah Go.