Clippers talsik sa Nuggets
DENVER — Nakahugot si Nikola Jokic ng kontribusyon mula sa kanyang mga teammates para sa 120-101 pagsibak sa Los Angeles Clippers sa Game 7 patungo sa Western Conference semifinals.
“It feels good,” sabi ni interim Denver coach David Adelman matapos ang kanilang panalo. “But I also know we’re flying to O-K-C tomorrow.”
Haharapin ng No. 4 seed Nuggets ang No. 1 seeded Oklahoma City Thunder, winalis ang Memphis Grizzlies sa first round, sa semis na magsisimula bukas.
Kapwa may 2-2 record ang Denver at Oklahoma City sa kanilang season series.
Humakot si Jokic ng 16 points, 10 rebounds at 8 assists para sa 4-3 pagtapos ng Nuggets sa kanilang serye ng Clippers.
Umiskor si Aaron Gordon ng 22 points, habang may 21, tig-16 at 15 markers sina Christian Braun, Jamal Murray, Russell Westbrook at Michael Porter Jr., ayon sa pagkakasunod.
“In playoffs we know that everybody needs to step up, offensively, defensively, whatever, energy-wise. And everybody who plays needs to contribute something,” wika ni Jokic. “It was special today the guys did that.”
Nilimitahan din ni Braun si Clippers star guard James Harden sa pitong puntos mula sa mahinang 2-of-8 field goal shooting.
“Everybody behind me allowed me to guard him. But I think maybe the biggest part was Russ,” wika ni Braun sa depensa ni Westtbrook. “He’s played against James, he’s played with James, so he knows his game.”
Pinamunuan ni Kawhi Leonard ang Los Angeles sa kanyang 22 points at may 10 markers si Ivica Zubac.
Samantala, nakatakdang magtuos ang Golden State Warriors at Houston Rockets sa Game 7 para huling West semis ticket.
- Latest
