Lucero hinirang na PBAPC POW

MANILA, Philippines — Tinanghal na PBA Press Corps-Pilipinas Live Player of the Week si Zavier Lucero ng Magnolia matapos gabayan sa malinis na kartada ang Magnolia Hotshots sa 2025 PBA Philippine Cup bago ang pahinga ng liga dahil sa Mahal na Araw.

Si Lucero, bagama’t sophomore palang, ang bumandera sa back-to-back wins ng Hotshots noong nakaraang linggo kontra sa Converge FiberXers at sibling rival na San Miguel Beer.

Nagrehistro siya ng 21.0 puntos sa 50% na field goal sahog pa ang 6 rebounds, 2 assists at 2 tapal sa 2 bigating panalo ng mga bataan ni coach Chito Victolero upang masolo ang liderato sa 12-team league hawak ang 3-0 kartada.

Una siyang nagpasiklab sa 83-71 panalo ng Magnolia kontra sa Converge matapos kumamada ng 18 puntos, 5 rebounds, 2 assists at 2 tapal sa pagdiriwang ng PBA ng ika-50 anibersaryo nito noong nakaraang Miyerkules.

Sinund an niya ito ng 24 puntps, 7 rebounds, 2 assists at 2 tapal ulit sa 98-95 comeback win ng Hotshots kontra sa Beermen sa laban ng 2 unbeaten teams bago ang PBA break.

Ito na ang ikalawang Player of the Week citation ni Lucero para sa pinakamarami ngayong season katabla sina Bong Quinto ng Philippine Cup champion Meralco, Joshua Munzon ng NorthPort at Calvin Oftana ng back-to-back champion Talk ‘N Text.

“It was a team effort for sure. I'm just grateful for the opportunity to be able to contribute. But sitting here (with individual citations) or me scoring or whatever it's (secondary),”ani Lucero na dinaig ang kakamping si Ian Sangalang pati na sina Xyrus Torres ng NLEX, Ricci Rivero ng Phoenix at June Mar Fajardo ng San Miguel.

“As long as we come out with the W, that's the most important part. I wouldn't be sitting here if guys didn't make plays down the stretch to make us win. It's a team sport, never just one. But all glory to God that I can do what I can do and hope I can continue.”