Tatapusin na ng Petro Gazz

MANILA, Philippines — Ayaw na ma­ulit ni Fil-Am Brooke Van Sickle ng Petro Gazz ang nang- yari noong 2023 1st Premier Volleyball League (PVL) All-Filipino Conference Finals.

Matapos ka­sing kunin ng Gazz Angels ang Game One ay inagaw ng Creamline Cool Sma­shers ang Game Two at Game Three para angkinin ang korona.

“We remember it, we take lessons from it, but we’re not going to relive it. One game at a time, one point at a time – we just have to finish it,” ani Van Sickle.

Pilit tatapusin ng Petro Gazz ang Creamline nga­yong alas-6:30 ng gabi sa Game Two ng 2024-25 PVL All-Filipino Confe­rence Finals sa Smart Araneta Coliseum.

Itinakas ng Gazz Angels ang 25-17, 25-20, 18-25, 20-25, 15-10 panalo sa Game One para sa 1-0 lead sa Cool Smashers sa kanilang best-of-three championship series.

Pagkakataon na ng Petro Gazz na makamit ang kanilang ikatlong PVL crown matapos magreyna sa 2019 at 2022 Reinforced Conference.

“I’m expecting Creamline to come out with their best volleyball on Thursday,” ani Van Sickle.

Muling makakatuwang nina Van Sickle at Phillips sina Myla Pablo, Jonah Sabete, Aiza Maizo-Pontillas at Chie Saet.

Sina Alyssa Valdez, Bernadeth Pons, Jema Galanza, Michele Gumabao, Tots Carlos, Pangs Panaga at Bea De Leon ang itatapat ng Cool Smashers na target ang ‘five-peat’ para sa kabuuang ika-11 titulo.

Sa unang laro sa alas-4 ng hapon ay pupuntiryahin ng Akari ang third place trophy sa pagharap sa Choco Mucho sa Game Two ng kanilang serye.