High5 Futsal tuloy sa programa

MANILA, Philippines — Mas lalo pang palalakasin ang High5 Futsal Men’s at Women’s Leagues sa layuning makatuklas ng mga bagong talento na isasabak sa mga major international competitions.

Mismong si High5 chief organizer Danny Moran na ang  nagpahayag nito sa pag-asang makadiskubre ng matitikas na futsal players mula sa iba’t ibang panig ng bansa.

Sa katunayan, karamihan sa mga miyembro ng Pinay5 Futsal Club ay produkto ng High5 program bilang patunay na maganda ang resulta ng inter-club leagues.

Si Moran ang chairman ng Henry V. Moran Foundation na siyang tumutulong sa pagpapalakas ng futsal sa bansa sa nakalipas na dekada.

Pinamunuan nito ang pagbuo sa High5 Leagues at Pinay5 Futsal Club ang unang professional futsal club sa Pilipinas.

“The High5 Futsal Men’s and Women’s Leagues represents the highest level of futsal in the country today as it features top clubs and universities. Now in their fourth year, the High5 Leagues are also the longest-running futsal leagues in Southeast Asia,” ani Moran.

Kasama ni Moran si Dutch coach Vic Hermans na Director for Sports sa Henry V. Moran Foundation gayundin sina key players Demely Rollon, Agot Danton, Isabella Bandoja, Jada Bicierro, Lanie Ortillo, Mykaella Abeto at Kaycee Nañola.

Ang Tuloy FC na binubuo ng mga less-fortunate pla­yers ang namamayagpag sa women’s division kung saan nanalo ito sa tatlong huling edisyon ng torneo habang ang Gawad Kalinga FC ang nanaig sa men’s side sa High5 Leagues noong nakaraang taon.