Morado hindi makakalaro sa AVC

MANILA, Philippines — Walang Jia Morado na masisilayan sa AVC Champions League na idaraos sa Abril sa Philsports Arena sa Pasig City.

Target sanang mapasama si Morado ng Creamline Cool Smashers sa AVC event subalit hindi ito matutuloy.

Unang problema ang schedule dahil kasalukuyang naglalaro si Morado para sa Denso Airybees na sasabak naman sa SVL Championship round sa Japan.

May kontrata si Morado sa Denso Airybees hanggang sa Mayo habang gaganapin naman sa Abril ang AVC Champions League.

Kaya naman ang Denso Airybees pa rin ang masusunod hanggang matapos ang kontrata nito sa Pinay setter.

Mismong kampo na ng Cool Smashers ang naglabas ng statement kung saan suportado nito ang kampanya ni Morado na matulungan ang Denso Airybees.

‘We want to express our heartfelt support for Jia De Guzman who’s currently under contract with Denso Airybees until May. As Denso gears up for the SVL Championship round, we acknowledge the hard work and dedication of all the players especially Jia who truly embodies the spirit of our sport,” ayon sa statement ng Creamline.

Isa ang Creamline sa magiging kinatawan ng bansa sa AVC Champions League kung saan maaari itong magpasok ng tatlong imports sa lineup nito.