Gawilan bigo sa IM, reresbak sa freestyle

MANILA, Philippines — Puntirya ni para swimmer Ernie Gawilan na makaresbak matapos ma­bigong makapasok sa podium sa Individual Medley sa 17th Paris Paralympics.

Inaasahang ilalabas ni Gawilan ang buong lakas nito sa kanyang huling event sa men’s 400m freestyle S7 race na idaraos ngayong araw sa Paris La Defense Arena.

Hawak ni Gawilan ang korona sa naturang event sa Asian level kung saan naghari ito sa 2018 Asian Para Games sa Jakarta, Indonesia at sa 2022 edition sa Hangzhou, China.

“Maayos ang pakiramdam ko. Bigay todo na ako dito,” ani Gawilan.

Bigo si Gawilan na makapasok sa podium sa men’s 200-meter individual medley SM7

Nagkasya lamang sa ikaanim na puwesto si Gawilan sa heat ng 200m IM preliminaries upang mabigong makapasok sa susunod na round.

Sa 400m freestyle, makakasama nito sa heat sian Inaki Basiloff ng Argentina, Andrii Trusov ng Ukraine, Yosjaniel Hernandez Velez ng Cuba at Yurii Shenhur ng Ukraine.

Si Basiloff ang nakakuha ng ginto sa 200m IM habang silver naman si Trusov.

Malakas sana ang tsansa ni Gawilan sa 200m IM para kay para swimming coach Tony Ong subalit kinapos ito sa breaststroke leg ng naturang event.