2-0 record itatayo ng SMB, NLEX
MANILA, Philippines — Pupuntiryahin ng San Miguel at NLEX ang ikalawang sunod na panalo sa pagharap sa kani-kanilang karibal sa PBA Season 49 Governors’ Cup sa Smart Araneta Coliseum.
Lalabanan ng Beermen ang Blackwater Bossing ngayong alas-7:30 ng gabi matapos ang pagharap ng Road Warriors sa Phoenix Fuel Masters sa alas-5 ng hapon.
Nagmula ang San Miguel sa 111-107 paggupo sa Phoenix tampok ang 37 points at 24 rebounds ni eight-time PBA MVP June Mar Fajardo.
“Kailangan namin mag-bounce back this conference. Last conference natalo kami, dinibdib namin ‘yun,” sabi ng 6-foot-10 na si Fajardo sa kabiguan ng San Miguel sa Meralco sa nakaraang PBA Philippine Cup Finals.
May 0-2 marka naman ang Blackwater matapos matalo sa Rain or Shine, 97-110, at sa NLEX, 87-104.
Target din ng NLEX ang ikalawang sunod na ratsada sa pagharap sa Phoenix.
Umiskor ang Road Warriors ng 104-87 pagbasag sa Bossing kung saan nagposte si Robert Bolick ng 24 points, 11 assists at 9 rebounds.
Nakalasap naman ang Fuel Masters ng 107-111 kabiguan sa Beermen.
“Stopping Robert and the import will be hard enough, but we also have to play really good defense against (Anthony) Semerad, (Ritchie) Rodger, (Robbie) Herndon, Matt Nieto,” ani Phoenix coach Jamike Jarin sa NLEX.
Samantala, diniskaril ng Rain or Shine ang Ginebra debut nina rookie RJ Abarrientos, Stephen Holt at Isaac Go matapos kunin ang 73-64 panalo kahapon sa Candon City Arena sa Ilocos Sur.
Ito ang ikalawang dikit na ratsada ng Elasto Painters para manguna sa Group B.
- Latest
