PH boxers pukpukan na sa ensayo
MANILA, Philippines — Kakasa ang Pinoy boxers sa huling Olympic qualifying tournament na idaraos sa Mayo 23 hanggang Hunyo 3 sa Bangkok, Thailand.
Desidido ang national boxing team na makakuha ng karagdagang tiket sa Olympics kung saan maghahanda ang mga ito sa USA Boxinf Multi-Nation Camp sa Denver, Colorado.
Kabilang dito sina Rogen Ladon, Criztian Pitt Laurente at Hergie Bacyadan.
Sa kabilang banda, mananatli sa Pilipinas si Tokyo Olympics silver medalist Carlo Paalam.
Nagpapagaling pa si Paalam sa injury na tinamo nito sa unang Olympic qualifying tournament sa Italy kamakailan.
Sasalang ito sa ensayo sa Baguio City kasama ang iba pang miyembro ng national team bago magtungo sa Bangkok para doon ipagpatuloy ang paghahanda.
Target ng Association of Boxing Alliances in the Philippines (ABAP) na madagdagan ang Pinoy boxers na masisilayan sa aksyon sa Paris Games.
Una nang umabante si Tokyo Olympics bronze medalist Eumir Marcial na nakahirit ng tiket sa Paris Games matapos ang kanyang silver-medal finish noong 19th Asian Games sa Hangzhou, China noong nakaraang taon.
Nakasiguro rin ng puwesto sa Paris sina Tokyo Olympics silver medalist Nesthy Petecio at Aira Villegas sa unang qualifying event sa Italy.
Sa kasalukuyan, may siyam na Pinoy athetes na ang nakapasok sa Paris Olympics.
Maliban kina Marcial, Petecio at Villegas, hahataw din sina pole vaulter EJ Obiena ng athletics, world champion Carlos Yulo at Aleah Finnegan ng gymnastics, at weightlifters Elreen Ando, John Ceniza at Vanessa Sarno.
- Latest
