Meralco lusot sa Terrafirma

MANILA, Philippines — Bumalikwas ang Me­ralco mula sa isang 11-point deficit sa thid pe­riod para balikan ang Terrafirma, 86-83, sa Season 48 PBA Philippine Cup ka­hapon sa Smart Araneta Coliseum.

Naglista si guard Bong Quinto ng 18 points, 7 rebounds at 4 assists para sa 3-3 record ng Bolts kasosyo ang Dyip sa pang-li­mang puwesto.

Umiskor si big man Nol­bert Torres ng 15 mar­kers kasama ang dala­wang three-pointers pa­ra sa Meralco, habang hu­ma­kot si Raymond Almazan ng 14 points.

Pinamunuan nina Ste­phen Holt at Juami Tiongson ang Terrafirma sa kanilang tig-20 points kasunod ang tig-11 mar­kers nina Aldrech Ramos at Javi Gomez De Liano.

Ang free throw ni Holt ang naglatag sa 54-43 ka­lamangan ng Dyip sa third quarter.

Bumida sina Torres, Quinto at Chris Banchero para ibigay sa Bolts ang 76-71 bentahe sa 6:18 minuto ng fourth period.

Naidikit ni Holt ang Terrafirma sa 83-85 sa hulng 6.6 segundo.

Matapos ang free throw ni Quinto para sa 86-83 abante ng Meralco sa natitirang 6.6 segundo ay hinablot ni Cliff Hodge ang offensive rebound para selyuhan ang kanilang panalo.

Samantala, pinatawan ng PBA si Magnolia forward Calvin Abueva ng one-game suspension at mul­tang P20,000 dahil sa middle finger incident sa kanilang ‘Manila Clasico’ ng Ginebra noong Linggo.