D’Navigators diretso sa 2-0 sa PNVF Champions League
MANILA, Philippines — Hinataw ng Iloilo ang ikalawang sunod na panalo sa Philippine National Volleyball Federation (PNVF) Champions League matapos upakan ang Philippine Air Force, 25-18, 25-21, 25-23, sa Rizal Memorial Coliseum kamakalawa.
Sinolo ng D’Navigators ang liderato sa Pool B sa kanilang 2-0 record para palakasin ang tsansa sa semifinals.
Pumalo si John San Andres ng 18 points mula sa 15 hits, 2 blocks at 1 ace para sa Iloilo na nakahugot kay Kyle Villamor ng 15 points.
Samantala, bumangon sa kabiguan ang VNS Asereht at College of St. Benilde para sa kanilang 1-1 baraha sa eight-team men’s tournament.
Tinalo ng Griffins ang Philippine Army Troopers, 25-23, 16-25, 25-22, 25-23, mula sa tig-14 points nina Kevin Montemayor at Charles Jordan Segui habang may 13 markers si Kenneth Culabat.
May 1-1 kartada ang VNS sa Pool B.
Giniba naman ng Blazers ang Savouge Spin Doctors, 25-20, 25-23, 25-23, tampok ang 14 points ni Mike Balbacal at tig-12 markers nina Jacob Herrerra at Arnel Aguilar.
Inilista ng St. Benilde ang 1-1 marka sa Pool A sa torneong inorganisa ni PNVF president Ramon “Tats” Suzara.
- Latest
