WADA nagbabala sa PSC

MANILA, Philippines — Posibleng hindi makita ang Philippine flag sa darating na Paris Olympics at sa Paralympic Games.

Ito ay kung hindi susunod ang Philippine Sports Commission (PSC) sa World Anti-Doping Agency (WADA) Code.

Nagbigay ng babala ang WADA sa PSC noong Enero 23 sa hindi pagtalima sa WADA Code at sa pagsagot ng government sports body sa outstanding non-conformities identified sa WADA Code Compliance Questionnaire.

Bukod sa Paris Olympics at Paralympic Games ay maaari ring hindi isama ang Philippine flag sa lahat ng regional at continental—Asian Games at Southeast Asian Games—at sa mga world championships.

Mahaharap din ang bansa sa ban sa pagho-host ng mga regional, continental at world championships.

Ipinabatid na ito ng WADA sa PSC sa pama­ma­gitan ng Philippine National Anti-Doping Agency (Phinado) noong Setyembre ng nakaraang taon.

Ngunit walang sagot ang PSC sa ilalim ni chairman Richerd Bachmann.

“Should the outstan­ding non-conformities not be solved by 22 Janua­ry 2024, the Philippines Sports Commission would be automatically alleged as non-compliant by WADA’s Executive Committee,” sabi sa sulat sa PSC na nilagdaan ni WADA Director General Olivier Niggli.

Binigyan ng WADA ang PSC ng hanggang Pebrero 13 para kontrahin ang paratang ng WADA na “non-compliance and/or the consequences of non-compliance and/or the reinstatement conditions proposed by WADA.”