Timberwolves lusot sa Clippers
MINNEAPOLIS — Iniskor ni Anthony Edwards ang 20 sa kanyang 33 points sa third quarter at humakot si Rudy Gobert ng 15 points, 18 rebounds at 4 blocks sa paggiya sa Minnesota Timberwolves sa 109-105 pagdaig sa Los Angeles Clippers.
Ang three-point shot ni Norman Powell ang tumapos sa 20-6 atake ng Clippers sa loob ng apat na minuto na nagdikit sa kanila sa Timberwolves sa 100-103.
Apat na free throws ang isinalpak ni Gobert para selyuhan ang panalo ng Minnesota (28-11) kontra sa Los Angeles (25-14).
Nagdagdag si Karl-Anthony Towns ng 17 points para sa Timberwolves na nilimitahan sina Clippers stars Paul George (16 points) at James Harden (14 points) sa malamyang 9-for-33 shooting sa 3-point line.
Pinamunuan ni Kawhi Leonard ang Los Angeles sa kanyang 26 points.
Sa Portland, humataw si Devin Booker ng 34 points para tulungan ang Phoenix Suns (21-18) sa 127-116 panalo sa Trail Blazers (10-29).
Sa Milwaukee, ipinasok ni Damian Lillard ang isang 3-pointer sa pagtunog ng final buzzer sa overtime sa 143-142 pag-eskapo ng Bucks (28-12) sa Sacramento Kings (23-16).
Sa Denver, nagposte si Nikola Jokic ng 25 points, 12 rebounds at 9 assists sa pag-akay sa nagdedepensang Nuggets (28-13) sa 117-109 paggupo sa Indiana Pacers (23-16).
- Latest
