UST babanggain ang NU sa SSL Finals

MANILA, Philippines — Abante na sa finals ang University of Santo Tomas matapos daigin ang karibal na Far Eastern U, 25-21, 25-20, 19-25, 25-20, sa knockout semifinals ng 2023 Shakey’s Super League (SSL) Collegiate Pre-Season Championship Season 2 kamakalawa ng gabi sa Rizal Memorial Coliseum sa Manila.

Makakaharap ng UST ang National University sa best-of-three championship series simula sa Biyernes para sa kanilang rematch matapos unang magpangbuno sa semifinals ng SSL Season 1.

Nauna nang nakadiretso sa finals ang reigning champion at unbeaten na Lady Bulldogs sa finals matapos walisin ang Adamson, 25-13, 26-24, 25-20, sa isang semis bracket.

Bumida sa four-set win ng Golden Tigresses ang super rookie na si Angeline Poyos matapos humataw ng 21 puntos sa 17 na attacks at 4 na supalpal.

Nag-ambag naman ng 15 at 14 markers sina Jonna Perdido at Regina Jurado, ayon sa pagkakasunod, para sa UST.

Nauwi sa bronze medal match ang FEU kontra sa Adamson habang magsasagupa ang St. Benilde at University of the East para sa No. 5 spot.

Kukumpleto sa Top 8 ang Ateneo at Arellano na maglalaban para sa ikapitong puwesto.