Tropang Giga ‘di nagkamali kay Hollis-Jefferson
MANILA, Philippines — Bagama’t inihatid ni import Jalen Hudson ang TNT Tropang Giga sa magandang 5-1 panimula ay nagdesisyon pa rin ang PLDT franchise na ipalit si Rondae Hollis-Jefferson.
Maganda naman ang naging resulta nito -- ang paghahari ng Tropang Giga sa kakatapos lamang na 2023 PBA Governors’ Cup Finals laban sa Ginebra Gin Kings.
“We felt like Jalen, he’s a scoring threat. But he couldn’t guard anyone. We could do better. And Rondae, he is a known defender,” ani interim coach Jojo Lastimosa sa dating NBA player.
Ang depensa ni Hollis-Jefferson sa huling dalawang posesyon ni import Justin Brownlee sa dulo ng fourth quarter ang nagpreserba sa 97-93 pagsibak ng TNT sa Ginebra sa Game Six ng PBA Finals noong Biyernes.
Tinapos ng Tropang Giga sa 4-2 ang kanilang best-of-seven championship series ng Gin Kings para angkinin ang pang-siyam na korona.
Ito ang kauna-unahang PBA Governors’ Cup title ng TNT na nakahugot kay Finals MVP Mikey Williams ng 38 points tampok ang siyam na three-point shots.
Ayon sa 28-anyos na si Hollis-Jefferson, wala sa kanyang plano ang maglaro sa PBA.
May five-day break ang No. 23 overall pick ng Portland Trail Blazers noong 2015 NBA Draft sa nilalaruang Korean league, at dahil walang magawa ay nagpasya siyang bumisita sa Boracay.
“I just so happened to end up in Boracay. And things weren’t working out in Korea, so I talked to my agent, I was like, ‘Hey, is there anything else available?’ And that’s when the PBA thing kind of came about,” ani Hollis-Jefferson.
Maski si Lastimosa ay nagulat na nasa bansa si Hollis-Jefferson.
At sa kanyang unang ensayo ay walang nakitang kayabangan sa katawan ang dating NBA campaigner.
“The first day in practice, being an NBA vet, you couldn’t see any arrogance on his part. He just bonded with the players right away,” wika ni Lastimosa sa PBA Best Import. “A calm demeanor, he’s not loud, which is really nice. It actually brought calmness to the team.”
- Latest
