Spurs binigyan ng regalo si Popovich
MIAMI — Nakuha ni Gregg Popovich ang magandang anniversary gift mula sa kanyang San Antonio Spurs.
Umiskor si Keldon Johnson ng 21 points at may 19 markers si Romeo Langford para igiya ang Spurs sa 115-111 pagdaig sa Heat at ipinagdiwang ang ika-26 anibersaryo ng unang laro ni Popovich bilang coach sa NBA.
“We won,” sabi ni Popovich sa San Antonio na may 8-18 record. “That’s what I liked the most.”
Kumamada si Jimmy Butler ng 30 points para sa Miami (12-15).
Nag-ambag si Devin Vassell ng 18 points para sa Spurs na hawak ang 113-111 abante sa huling 14.7 segundo kasunod ang mga mintis na triples nina Herro at Martin para sa posesyon ng Heat.
Sa Indianapolis, tumipa si Cam Thomas ng career-high na 33 points kasunod ang 24 markers ni Patty Mills sa 136-133 pagtakas ng Brooklyn Nets (16-12) sa Indiana Pacers (14-13).
Sa Washington, humataw si Paul George ng 36 points para ihatid ang Los Angeles Clippers (15-13) sa 114-107 pagsapaw sa Wizards (11-16).
- Latest
