Brickman 19 assists ang ginawa sa panalo ng Aquas
MANILA, Philippines — Nagpakawala ng season-best na 19 assists si Filipino-American ace Jason Brickman sa 103-93 panalo ng league-leading Kaohsiung Aquas kontra sa Tainan sa T1 League ng Taiwan.
Nagdagdag pa ng 16 points at 6 rebounds si Brickman para sa all-around performance at may game-high na 27 markers at 12 rebounds si Mindaugas Kupsas.
Dahil sa panalo ay napatatag ng Kaohsiung ang kapit sa liderato hawak ang 17-6 baraha.
Sumadsad naman sa kulelat na puwesto ang Tainan (4-17) na makakaharap ulit ng Aquas ngayong Linggo.
Samantala, naglista ng 14 points, 6 rebounds, 3 assists at 2 steals si Jordan Heading sa dikit na 98-93 tagumpay ng Taichung Suns sa Taoyuan Leopards.
Nakatulong niya si Anthony Tucker na may 33 markers para sa Suns na napanatili rin ang puwesto sa tersera hawak ang 14-8 kartada.
Nagkasya lang sa dalawang puntos ang isa pang Fil-Am na si Ceelan Tiongson para sa Taoyuan na nahulog sa 5-15 marka.
Inaabangan sa paparating na 2022 PBA Rookie Draft sina Brickman at Tiongson.
- Latest
