Pasok sa 2nd round si Eala

MANILA, Philippines — Patuloy ang panana­lasa ni tennis sensation Alexandra Eala matapos ilampaso si Annerly Poulos ng Australia, 6-1, 6-2, sa first round ng 2019 US Open juniors tournament girls’ singles sa Billie Jean King Tennis Center Court 4 sa New York.

Inilabas ni Eala ang matikas na baseline game para mabilis na patumbahin ang mas matandang Australian bet sa larong tumagal lamang ng 57 minuto.

Nagtala ang 14-an­yos na Pinay netter ng apat na break points, habang mayroon siyang 20-of-25 (80%) percentage sa first serve at 16-of-28 (57%) sa second serve kontra sa 71% at 18% lamang ni Poulos na kasalukuyang No. 49 sa world ranking ng International Tennis Fe­deration.

Nasa ika-114 naman si Eala na inaasahang aa­ngat pa sa oras na maisama ang puntos na makukuha niya sa US Open.

Nakakuha pa si Eala ng 26-of-50 (52%) sa re­ceiving points laban sa 17-of-53 (32%) ni Poulos.

Nakagawa ng anim na unforced errors si Poulos.

Makakatapat ni Eala sa second round si Mai Na­patt Nirundorn ng Thai­land na na­naig laban kay eighth seed Hur­rican Tyra Black ng Amerika, 1-6, 5-2 (ret.).

Ito ang ikatlong panalo ni Eala sa Grand Slam event matapos pataubin sina Kimmi Hance ng Amerika, 6-3, 7-5, at top seed Romana Cisovska ng Slovakia, 6-3, 6-0, sa qualifying round.

Nahasa nang husto ang laro ni Eala sa kanyang pagsasanay sa Ra­fa­­el Nadal Academy ni Grand Slam champion Ra­­fael Nadal.