Batangas vs Davao Occidental sa Southern Division Finals
BATANGAS CITY — Pinabagsak ng host Batangas City ang Zamboanga, 80-72, sa kanilang ‘do-or-die’ semifinals duel para umabante sa championship round ng MPBL Datu Cup Southern Division noong Martes ng gabi dito sa Batangas Sports Arena.
Sumandal ang Athletics kay 2018 season MVP Val Acuña na umiskor ng siyam sa kanyang 17 points sa third period katuwang sina Jeff Viernes at Jhaymo Eguilos para sibakin ang Zamboanga.
Kumamada sina Viernes at Eguilos ng 10 sa 20 points ng Batangas City sa fourth period.
Tumapos si Viernes na may 15 points at 9 rebounds, habang kumolekta sina Eguilos at Adrian Santos ng 13 at 10 points, ayon sa pagkakasunod, para sa Athletics.
Lalabanan ng Batangas City ang Davao Occidental sa best-of-three championship series.
“Ang sabi ko sa mga players ko, sundin lang natin ‘yung Sistema and if ever man matalo tayo, matatalo tayo sa mga kamay ko,” sabi ni head coach Mac Tan sa kanyang Athletics.
Winalis naman ng Tigers ang Bacoor Strikers, 2-0, sa kanilang semifinals showdown.
- Latest
