Nangunguna ang Santo Tomas

MANILA, Philippines — Nanatiling nakakapit sa unahan ang reigning champion University of Santo Tomas sa UAAP Season 81 general championship race.

Nakalikom na ang Tigers ng kabuuang 212 puntos sa pagtatapos ng 10 sports kung saan nakakuha ito ng pitong kampeonato tampok ang sweep sa men at women’s judo, men at women’s beach volleyball, at men at women’s table tennis. Pinagreynahan din ng Tigresses ang women’s athletics.

Maliban sa gintong medalya, may apat na runner-up trophies ang UST mula sa men at women’s taekwondo, poomsae taekwondo at women’s fencing, at isang third-place finish sa wo-men’s basketball.

Pumapangalawa ang University of the Philippines na mayroong 188 puntos galing sa isang ginto (men’s athletics), anim na pilak (men at women’s badminton, men’s basketball, women’s swimming, women’s chess, at women’s judo) at limang tanso (men’s judo, poomsae, women’s athletics, women’s table tennis at women’s beach volleyball).

Nakabuntot sa ikatlo ang De La Salle University bunsod ng 178 puntos na nakuha nito tampok ang pamamayagpag sa wo-men’s chess at poomsae.

Nasa ikaapat ang Ateneo de Manila University tangan ang 155 puntos na karamihan ay mula sa korona nito sa men’s basketball, men at women’s swimming, women’s badminton at women’s fencing.

Pasok sa ikalima ang National University na nagkampeon sa women’s basketball, men’s badminton, at men at women’s taekwondo para makakuha ng 131 puntos habang ikaanim ang men’s fencing champion University of the East (125 points), ikapito ang men’s chess titlist Far Eastern University (105 points) at ikawalo ang Adamson University (76 points).

Iniiskoran ng UAAP ng 15 puntos ang first place, 12 puntos ang second, 10 puntos ang third, walong puntos ang fourth, anim na puntos ang fifth, apat na puntos ang sixth, dalawang puntos ang seventh at isa ang eighth.

Limang sports na lamang ang nalalabing pinaglalabanan o paglalaban - ang volleyball, softball, football, baseball at tennis.