Warriors dumiretso sa ika-24 sunod na ratsada
BOSTON – Umarangkada ang nagdedepensang Golden State Warriors sa kanilang best start na 24-0 matapos takasan ang Boston Celtics, 124-119, sa double overtime.
Tumapos si Stephen Curry na may 38 points sa kabila ng pinakamasama niyang shooting performance sa season.
Nagdagdag siya ng 11 rebounds at 8 assists para pamunuan ang Warriors.
“Exhausting, but it was fun,” sabi ni Curry. “Obviously, it was nice to get the win. But we had to claw our way to it.”
Isama na ang apat na sunod na panalo sa nakaraang season, may 28-0 karta ngayon ang Golden State sa regular-season para basagin ang kanilang pagkakatabla sa 2012-13 Miami Heat para sa second-longest winning streak sa league history.
Ang Los Angeles Lakers ay nagtala ng 33-game winning streak noong 1971-72.
Lalabanan ng Warriors ang Milwaukee Bucks sa Sabado para kumpletuhin ang kanilang seven-game road trip.
Wala pang NBA team na nakapagtala ng 7-0 sa isang single road trip.
Nagposte si Curry ng 9-of-27 fieldgoal shooting na pinakamasama niya matapos noong Game 2 ng kanilang NBA Finals ng Cleveland Cavaliers.
Ngunit tumikada naman siya ng 6-for-13 clip sa 3-point range at ang perpektong 14-of-14 sa free throw line.
“He can score in so many different ways,” sabi ni interim coach Luke Walton kay Curry. “They did a phenomenal job on him and he scored 38. But that’s how superstars are in this league.”
Nagdagdag naman si Draymond Green ng 24 points, 11 rebounds, 8 assists at 5 blocked shots, habang nag-ambag si Andre Iguodala ng 13 markers at 10 boards para sa panalo ng Warriors.
Naglaro ang Golden State nang wala sina injured guard Klay Thompson at Harrison Barnes.
- Latest
