Rain or Shine dinungisan ang Purefoods sa Dipolog

MANILA, Philippines – Matapos ang apat na sunod na arangkada ay natik­man ng nagdedepensang Purefoods ang kanilang kau­na-unahang kabiguan sa 2015 PBA Commissioner’s Cup.

Ito ay matapos bumalikwas ang Rain or Shine Elasto Painters mula sa 14-point deficit sa se­cond period para sa kanilang inspiradong 78-71 panalo kontra sa Hotshots kagabi sa Dipolog Sports Center sa Dipolog City.

Nagsalpak si combo guard Paul Lee ng 18 points kasunod ang tig-12 nina import Rick Jackson at Jeff Chan at 10 ni Beau Belga, kumonekta ng isang three-point shot sa huling dalawang minuto ng fourth quarter, para sa Rain or Shine.

Kinuha ng Purefoods ang 38-24 kalamangan sa 3:58 minuto ng second period mula sa split ni Alex Mal­lari.

Tumikada naman ang Rain or Shine ng 22 points sa kabuuan ng third quarter para agawin ang 60-53.

Ang basket ni Jackson ang naglayo sa Elasto Pain­ters sa 75-64 sa huling 3:28 minuto ng final canto.

Umiskor si import Daniel Orton ng 23 points para banderahan ang Hotshots kasunod ang 11 ni Mark Bar­roca, habang nalimitahan si two-time PBA Most Valuable Player James Yap sa 2 markers.

Samantala, hangad ng Meralco ang kanilang pang-limang sunod na panalo sa pakikipagtuos sa Globalport ngayong alas-3 ng hapon sa Mall of Asia Arena sa Pasay City.

Laban sa Bolts, ipaparada ng Batang Pier ang ba­gong import na si Calvin Warner na siyang pumalit kay CJ Leslie.

Magtatagpo naman ang Barangay Ginebra, nasa isang two-game winning run matapos ang 0-2 pani­mula, at ang Talk ‘N Text sa alas-5:15 ng hapon.

Nanggaling ang Gin Kings sa 95-82 panalo laban sa San Miguel Beermen at sa 100-92 paggiba sa Kia.

“Sana magtuluy-tuloy. Hindi ko maintindihan ang mentality eh. Parang de-susi,” ani head coach Ato Agustin sa kanyang Ginebra.

Inaasahan namang pormal na ihahayag ni Chito Sa­lud ang kanyang pagbibitiw bilang PBA Commissioner matapos ang Meralco-Globalport game.

Ilan sa mga sinasabing maaaring humalili kay Sa­lud matapos ang 40th PBA season ay sina da­ting GMA 7 top official Bobby Barreiro, dating PBA pla­yer at UAAP Commissioner Chito Loyzaga, dating PBA coach at UAAP Commissioner Chito Narvasa at Ariel Magno, dating alternate governor sa PBA Board ng Sta. Lucia.

RAIN OR SHINE 78 – Lee 18, Chan 12, Jackson 12, Belga 10, Norwood 7, Tiu 6, Araña 6, Uyloan 3, Tang 2, Quiñahan 2, Almazan 0, Cruz 0.

Purefoods 71 – Orton 23, Barroca 11, Maliksi 9, Mal­lari 7, Devance 6, Melton 6, Pingris 4, Pennisi 3, Yap 1, Taha 1, Reavis 0.

Quarterscores: 18-20; 38-40; 60-53; 78-71.