Roach umaasa pa rin Sa Pacquiao-Mayweather fight

MANILA, Philippines - Bagama’t maraming nagsasabing malabong maitakda ang super fight nina Manny Pacquiao at Floyd Mayweather, Jr. dahil sa ilang isyu, kumpiyansa naman si chief trainer Freddie Roach na mangyayari ito ngayong taon.

Sa panayam ng The Sweet Science kahapon, sinabi ni Roach na nakausap niya si Bob Arum ng Top Rank Promotions at positibo ang kanyang natanggap na kasagutan.

“I think I’m getting close to saying it’s very close, I think we’re very close,” sabi ni Roach sa pinaplantsang mega showdown ng 36-anyos na si Pacquiao at ng 37-anyos na si Mayweather.

Halos limang taon nang tinatangkang itakda ang banggaan ng 36-anyos na si Pacquiao (57-5-2, 38 KOs) at ng 37-an-yos na si Mayweather (47-0-0, 26 KOs).

 Ang mga isyung bumabalot dito ay ang hatian sa prize money at pagsailalim sa isang Olympic-style random drug at blood testing.

Sinabi ni Mayweather na handa siyang labanan ang Filipino world eight-division champion sa Mayo 2, 2015.

Ngunit ayon kay Pacquiao, maniniwala lamang siya kung makikita niya ang mismong lagda ng American world five-division titlist sa fight contract.

Sinabi naman ni Arum na patuloy siyang nakikipag-usap kay Les Moonves ng CBS, ang parent network ng Showtime kung may exclusive contract si Mayweather.

“It’s close. I think I know for a fact that it’s closer than ever,” sabi ng five-time Trainer of the Year awardee na si Roach.

Patuloy pa rin ang sagutan nina Pacquiao at Mayweather sa social media.

Kamakalawa ay nagposte si Mayweather sa kanyang Instagram ng kanyang litrato kasama ang mga mamahalin niyang sports car na Bugatti Veyron, Bugatti Gran Sport, Ferrari 458 Spider, Lamborghini Aventador, Porsche 911 Turbo S at Ferrari 599 GTB Fiorano at isang private jet.

Hindi naman ito pinansin ni Pacquiao at sinabing tigilan na ng American world five-division titlist ang kanyang kayabangan at pumirma na lamang ng fight contract.

“Floyd brags about his lifestyle and everything! I don’t care! I’m just waiting here for him to sign the contract! #fightpacquiao,” poste ni Pacquiao sa kanyang Instagram. (Russell Cadayona)