Next Time rumemate sa 3YO Imported Horse race
MANILA, Philippines — Hinangaan sa karerahan ang ipinakitang husay ng Next Time matapos sikwatin ang korona sa MMTCI-sponsored race 3-Year-Old Imported Horse sa Metro Turf, Malvar sa Tanauan City, Batangas noong Linggo ng hapon.
Mabilis na lumabas ng aparato ang Tabby Kat para hawakan agad ang bandera subalit dinikitan ito ng Next Time na ginabayan ni John Alvin Guce.
Naging agresibo ang Tabby Kat sa kaagahan ng karera kaya naman nailayo nito ng tatlong kabayo ang agwat sa pumapangalawang Next Time sa kalagitnaan ng karera.
Papalapit ng far turn ay umabot pa sa limang kabayo ang lamang ng Tabby Kat sa Next Time at sa Glassgow Kiss na malakas ang dating.
Pero hindi nagpabaya ang Next Time, uminit ang labanan sa unahan nang magsimulang rumemate ang winning horse at makadiklit sa Tabby Kat pagsapit ng huling kurbada.
Sa huling 100 metro ng karera sa rektahan ay umungos sa unahan ang Next Time na dumaan sa tabing balya upang tawirin ang meta na may tatlong kabayo ang abante sa pumangalawang Malagu, pumangatlo ang Glassgow Kiss, habang pang-apat ang Tabby Kat.
Inirehistro ng Next Time ang 1:40.8 minuto sa 1,600 meter race sapat upang hamigin ni winning horse owner Melvin Raymundo ang P240,000 sa karerang suportado ng Philippine Racing Commission.
Nasilo ng Malagu ang second place prize na P90,000 at may P50,000 at P20,000 ang third at fourth placers na Glassgow Kiss at Tabby Kat, ayon sa pagkakasunod.
- Latest

















