Reyes, Immonen nagparamdam

GENERAL SANTOS CITY, Philippines – Kapwa pinagulong nina Efren ‘Bata’ Reyes at Mika Immonen ang kanilang mga karibal para sa opening round ng Philippine Open 10-Ball Championship dito sa SM City Mall.

Ipinakita ng 60-anyos na si Reyes, ang ‘living le-gend’ ng Philippine billiards, ang kanyang malawak na eksperyensa nang pataubin si Jerome Adolfo, 9-2 habang dinomina ni Immonen si John Salazar, 9-2 sa nasabing $150,000 tournament na itinataguyod ni Cong. Manny Pacquiao.

Giniba naman ni Brunei pride Ahmad Taufiq si John Bautista, 9-2 samantalang umiskor din ng panalo sina local bets Leo Bayet, Godofredo Ducanes, Archie Padal, Benjie Guevarra, John Rebong, Johann Chua at Christian Gariando.

Tinalo ni Canadian John Morra si Mohammad Al-Shamari, 9-4 para sa kanyang unang panalo.

Kasalukuyan pang nilalabanan ni Van Boening si Archie Ygloria at kasarguhan ni Rodney Morris si Raymond Faraon habang isinusulat ang balitang ito.

Samantala, ginitla ni John Plunkett ng United States si Pacquiao, 9-8 para pigilan ang pag-abante ng eight-time boxing champion sa second round ng nasabing double-knockout tournament.

Angat si Pacquiao sa 8-7 bago siya naresbakan ni Plunkett para kunin ang panalo.

“This single victory feels like a million,” sabi ni Plunkett matapos talunin si Pacquiao.