Liderato pupuntiryahin ng PLDT kontra Ateneo
MANILA, Philippines - Kakalas ang PLDT Home Telpad sa isang three-way tie sa unang puwesto, habang kakapit pa ang Air Force sa mahalagang pang-apat na puwesto sa pagsisimula ng quarterfinals ng Shakey’s V-League Season 11 Open Conference sa The Arena sa San Juan City.
Anim na koponan na lamang ang maglalaban-laban para madetermina kung sino ang apat na uusad sa semifinals sa ligang inorganisa ng Sports Vision katuwang ang Shakey’s at may ayuda ng Accel at Mikasa.
Haharap ang Turbo Boosters sa Ateneo Lady Eagles sa tampok na laro hangad ang ika-pitong panalo sa walong laro na maglalapit din sa koponan sa puwesto sa Final Four.
Ang Army Lady Troopers at ang nagdedepensang Cagayan Valley Lady Rising Suns ay may 6-1 karta kaya’t pansamantalang hahawakan ng solo ng PLDT ang liderato kung mananalo sa Lady Eagles na nasa ikaanim na puwesto sa 2-5 baraha.
Mahirap na daan ang tatahakin ng Ateneo para umabante pa dahil dalawang laro ang hinahabol nila sa Air Force sa 4-3 karta ang may tangan sa huling upuan na aabante sa susunod na yugto.
Yumuko ang Lady Eagles sa Turbo Boosters sa kanilang pagkikita sa elims, 21-25, 13-25, 24-26, at papasok sa laro buhat sa five-sets loss sa Army at Cagayan Valley.
Ngunit ang determinasyon ng koponang pinangungunahan ni Alyssa Valdez ang kanilang huhugutan ng lakas para masilat ang PLDT.
- Latest
