Isa na namang pagsubok sa Power Pinoys

MANILA, Philippines - Nahaharap uli sa matinding pagsubok ang PLDT TVolution Power Pinoys sa pagbubukas ng quarterfinals ng  Asian Men’s Club Volleyball Championship ngayon sa  Mall of Asia Arena sa Pasay City.

Kalaro ng Power Pinoys ang pumangalawa sa huling edisyon na Al-Ray-yan ng  Qatar sa ikatlong laro dakong alas-6 ng gabi.

Ang mananalo rito ang siyang uusad sa semifinals habang ang matatalo ay magkakaroon na lamang ng pinakamagandang pagtatapos na ikalimang puwesto sa ligang handog ng PLDT Home Fibr at inorganisa ng Sports Core katuwang ng Philippine Volleyball Federation.

Tiyak naman na gagawin ng home team ang lahat ng makakaya para bigyan ng magandang laban ang Qatar na hindi natalo matapos ang apat na laro sa Group C.

May 1-1 karta ang Pi-lipinas  sa Group A.