Davao delegation sa Batang Pinoy binawasan

MANILA, Philippines - Nabawasan ang kinatawan ng Mindanao sa 2013 Batang Pinoy National Finals nang magpasya ang Davao City na huwag magpadala ng buong delegasyon sa kompetisyon na gagawin sa Bacolod City mula Enero 28 hanggang Pebrero 1.

Halos kalahati sa 602 batang manlalaro mula Mindanao na nakakuha ng puwesto sa National Finals ang nanggaling sa Davao City pero ipinarating na ni dating PSC chairman at ngayon ay Davao City Sports Commission head William Ramirez na hindi sila sasali dahil sa kakulangan ng pondo.

Ang mga pambato ng Davao ang nagdomina sa la-rong athletics, boxing at judo sa Mindanao qualifier.

“They told us that they don’t have enough fund to send all athletes who qualified to the Finals. Pero ‘yung mga swimmers na can afford to pay for their own expenses will compete,” wika ni PSC Batang Pinoy Games chairman Atty. Jay Alano.

Ang National Finals ay dapat idinaos noon pang Nobyembre 19 hanggang 23 pero ipinagpaliban ito nang hagupitin ang Kabisayaan ng Super typhoon Yolanda.

Umabot sa 815 ang mga nag-qualify sa Luzon habang may 602 ang pumasa sa Visayas elimination.

Kasabay nito ay inanunsyo rin ni Alano ang pagtanggal sa mga larong pencak silat at soft tennis dahil sa kakulangan ng bilang ng maglalaban. Ang dalawang sport na ito ay kasama ng cycling at triathlon na magsagawa ng kanilang National championships sa Bacolod.