Rios nangakong magbibigay ng magandang laban vs Pacquiao

MANILA, Philippines - Isang maaksyon at madugong laban ang ipinangako ni Mexican-American Brandon ‘Bam Bam’ Rios para sa kanilang non-title, welterweight fight ni Manny Pacquiao sa Nobyembre 23 sa The Venetian sa Macau, China.

“All out war, it’s gonna be an all out war,” wika ni Rios sa panayam ng On The Ropes Boxing Radio.

Ito ang unang pag-akyat sa boxing ring ng Filipino world eight-division champion na si Pacquiao matapos matalo kina Timothy Bradley, Jr. at Juan Manuel Marquez noong nakaraang taon.

At inaasahan ng 27-anyos na si Rios na magpapakitang-gilas ang 34-anyos na si Pacquiao sa kanilang banggaan.

Hindi pa sinisimulan ni Pacquiao, nakamit ang kanyang ikalawang sunod na termino bilang Congressman ng Sarangani sa nakaraang eleksyon noong Mayo, ang kanyang pagpapakondisyon.

Inumpisahan naman ni Rios ang kanyang pakikipag-sparring kay Marcos Maidana noong Marso.