May comment si Mayweather

MANILA, Philippines - Hangad ni Floyd Mayweather Jr. ang mabilis na pagbangon ni Manny Pacquiao matapos lumasap ng knockout na pagkatalo sa kamay ni Mexican boxer Juan Manuel Marquez noong Linggo sa MGM Grand Arena sa Las Vegas, Nevada.

“I wish Pacquiao nothing but the best. I wish that he can bounce back and he can recoup from this,” wika ni Maywea-ther sa panayam ng Fighthype.

Kakaibang pahayag ang namutawi kay Mayweather na ilang taon na minamaliit ang kakayahan ni Pacquiao. Nagkademandahan pa nga ang dalawang hinirang bilang mga pound-for-pound king sa boxing matapos akusahan niya ang pambansang kamao na gumagamit ng mga droga kaya’t naipapanalo ang mga laban kahit sa mas mabigat na timbang.

Ngunit umiral ang pagi-ging isang boksingero ni Mayweather matapos ang paglasap ng pinakamasamang pagkatalo ni Pacman na nabuwal una ang mukha sa lona matapos tamaan ng solidong counter-right isang segundo bago natapos ang sixth round.

“I’m not here to talk bad about Pacquiao. My prayers go out to the Pacquiao family. I know he loves boxing,” dagdag ni Mayweather.