JRU, Informatics unahan sa panalo

MANILA, Philippines - Mag-uunahan ngayon ang mga bagitong koponan na Jose Rizal University at Informatics na makatikim ng unang panalo sa PBA D-League Aspirants’ Cup na magbabalik ngayong hapon sa Ynares Sports Arena sa Pasig City.

Magkukrus ang landas ng Heavy Bombers at Icons sa ganap na ika-2 ng hapon at ang mananalo ay magkakaroon uli ng liwanag sa kampanya sa 11 koponang liga.

Mahalaga ang bawat laro dahil single-round ro-bin lang ang eliminasyon at ang mangungunang dalawang koponan ang aakyat sa semifinals habang ang sunod na apat na koponan ang maglalaban-laban sa quarterfinals. Ang huling apat ay laglag na.

Ang NLEX ang nakasukatan ng dalawang ito at ang JRU ay natalo sa 87-91, habang ang Icons ay yumukod sa dikitan ding 81-88 iskor.

Sa ikalawang laro, tatangkain ng Cebuana Lhuillier na wakasan ang dalawang dikit na pagka-talo sa pagharap sa Café France dakong alas-4.

Lagapak ang Gems sa Fruitas, 90-91 at sa Big Chill, 61-81, upang malagay ang koponang sinasabing palaban sa kampeonato matapos magpalakas sa off-season, sa pakikisalo sa ikaapat at limang puwesto.

Hindi  nakakasiguro ang tropa ni coach Beaujing  Acot dahil ang Bakers ay galing sa 73-58 dominasyon sa Erase Xfoliant tungo sa 2-1 baraha.