“Ano pang pinag-usapan n’yo ni Mama, Brent?’’ tanong ni Lea.
“’Yun lang tungkol sa relasyon natin at ang hindi niya pagpapatawad sa iyong papa. Ayon sa kanya, magiging plastic lang siya kung papatawarin niya pero malalim pa rin ang iniwang sugat. Nagsasabi lang daw siya ng totoong damdamin.’’
“Ganyan talaga si Mama. Ang nasabi ay pinaninindigan at walang makakapagpabago ng mga iyon.”
“Oo nga, Leah. Kaya nga hanga ako sa mama mo.’’
“Wala siyang pinagsisisihan sa hindi pagpapatawad kay Papa.’’
“Pero ikaw, napatawad mo na ang papa mo?”
“Kung ano ang posisyon ni Mama, ganun din ako. Nadama ko kasi ang sakit na ginawa ni Papa kay Mama.’’
Napatango na lang si Brent. Siya man ay ganundin ang nadama nang gumawa ng kasalanan ang kanyang mama. Pinatawad ng kanyang papa ang kanyang mama pero siya ay hindi. Dumalaw siya sa kanyang mama pero iyon ay para pagbigyan lang ang kanyang papa.
Hindi inaasahan ni Brent ang pagtawag ng kaibigang si Julio. Hiniling ni Julio na magkita sila.
Nagkita sila sa isang restaurant kinagabihan.
“Kumusta Julio? Mukhang wala ka nang problema.”
“Wala na. Patay na ang naghatid ng problema.’’
(Itutuloy)