Halimuyak ni Aya (79)

“HELLO, sino ito?”

Tinig ni Aya. Malam­bing. Masarap sa taynga. Lumakas ang tibok ng puso ni Sam. Sa di-kalayuan ay nakatingin sina Tatay Ado at Nanay Cion. Nakikinig. Excited din sila sa pag-uusap nina Sam at Aya.

“Si Sam ito. Kumusta ka Aya?”

“Sam?!”

“Oo ako si Sam.”

“Kasi nagbago ang boses mo, Sam. Akala ko kung sino.”

“Mabuti hindi nagbago ng number ang cell ni Mama Brenda. Try lang ang pagtawag ko sa number.­’’

“Paano mo nalaman ang number?”

“Di ba binigay mo sa akin.”

“Ay oo nga.”

“Kumusta ka na Aya? Pati si Mama Brenda?”

“Mabuti naman... si Mama okey… din.”

“Bakit hindi na kayo umuuwi rito?”

“E, nag-aaral ako. Hindi naman maaaring mag-absent.­”

“Di ba wala namang pasok pag-Linggo?”

“Nag-aaral ako ng lesson­ kapag Sunday.”

“E kailan kayo uuwi rito?”

“Hindi ko alam. Walang sinasabi si Mama.’’

“Siguro ayaw mo nang pumunta rito?”

“Gusto. Si Mama nga lang ang masusunod kung kailan kami pupunta.”

“E kumusta naman ang studies mo?”

“Okey naman. Ikaw, kumusta ang studies mo?”

“Ako ang top sa klase.”

“Overall?”

“Oo.”

“Wow ang galing!”

“Hindi naman.”

“Paano ka nagka-cell phone?”

“Binili ni Lolo. Mabuti nga at binili ako. Natatawagan na kita.”

Maya-maya tumigil si Aya sa pagsasalita. Nasagap naman ni Sam na may nagsisigawan. Pagkatapos ay nagsalita uli si Aya.

“Mamaya ka na lang uli tumawag Sam. Kasi… basta mamaya na!”

(Itutuloy)