Real estate broker inutas sa loob ng sasakyan

MANILA, Philippines — Isang real estate broker ang natagpuang patay na may mga tama ng bala sa loob ng isang pick-up truck na noon ay tatlong araw nang nakaparada sa Barangay San Jose sa Pagadian City nitong Linggo.

Sa ulat ng Pagadian City Police Office nitong Lunes, nagsisimula nang maagnas ang bangkay ng negosyanteng si Michael Obsiana nang madiskubre at mailabas ng mga pulis at mga emergency responders sa naturang sasakyan.

Nasa passenger side ng front seat ng sasakyan nakaupo ang patay na si Obsiana at nawawala ang driver nito na inaalam pa ng mga imbestigador kung sino.

Nangako ng kooperasyon sa mga imbestigador ang pamilya ni Obsiana na nais ng makilala agad ang pumaslang sa kanya upang masampahan ng kaukulang kaso.